غدانا امس سمك محشي

هلا بنات

أمس غدانا سمك محشي في الفرن عاد اني وابو الشباب نحب هالطبخه موووووت والنسيب يشتغل في سوق السمك
يعني هوايته يجيب الهوامير حق المحشي
وقلت اليوم بسويها وبوريكم طريقتي الي اخذتها من الوالده الله يعطيها العافيه وتراها لذييييذة جدا جدا

يالله اخذوا المقادير


سمكة شعريه او هامور او بالول الي يعجبكم بس اني اليوم سويت شعري تقريبا وزنها كيلو
ثلاث بصلات مفرومين ناعم
ثلاث فصوص ثوم مفرومين
2 ليمون اسود مقطع قطع صغيره مو المطحون لا احنا نكسره بيدنا
زبيب
صنوبر
ليمون اخضر وملح الليمون
قبضه من الكزبرة الخضراء


اول شي
نخلط البصل مع الثوم والليمون والزبيب والصنوبر ونخلطهم وبعدين نرشهم بالبهارات والملح على حسب الرغبه وتكون الحشوه معانا بهذا الشكل


الان نغسل السمكه زين مازين ونفركها بالليمون وملح الليمون وبعدين نبهرها ونملحها ونفركها بالبهارات والملح زين مازين حتى تتغلغلها عدل ونسوي شق في بطن السمكة ونحشيها بالحشوة حتى يمتلأ بطنها
ونضع الكزبره في حلق السمكه وبتكون جاهزة بهذا الشكل


نغلفها بورق القصدير وندخلها الفرن ويكون مسخن من قبل على حرارة متوسطه ونتكرها في الرف السفلي لمدة نص ساعه وبعد النص ساعه نفتح القصدير ونرجعها للفرن حتى تقريبا ينشف الماء الي طلع منها
وبعدين نحطها في الرف العلوي ونحمرها
وهذا شكلها بعد ما تحمرت



طبعا زوجي يحبها محروقه من فوق بس اني صورتها قبل لالااحرقها له عشان منضرها كذا احلى بصراحه
وماننسى باقي الحشوة نحط فيها قليل من الزبده والزيت ونحمصها على النار
تقدم السمكه مع الرز الابيض ومنثور على وجهه باقي الحشوة الي حمصناها



للاسف ماقدرت اصور السمكه بعد مازينتها لان زوجي كان جوعان واكل منها وشوهها
ومادري لاويش بدى بالدنبه


ان شاء الله تكون عجبتكم ودعواتكم لي